د هرات پوهنتون کې د نیالګیو اېښودلو بهیر پیل شو.
الحاج مولوي عبدالعلي متقي، د هرات ولایت د چاپېریال ساتنې رئیس، د هرات پوهنتون د نیالګیو اېښودلو د بهیر له پيل څخه لیدنه وکړه. نوموړي د دې نیک اقدام هرکلی وکړ او وویل چې د چاپېریال ساتنې ریاست هم پلان لري چې راتلونکې اوونۍ د دې علمي بنسټ لپاره ۵ زره بېلابېل نیالګي ورکړي.
همداراز، د هرات د چاپېریال ساتنې رئیس د یوه چاپېریالي سیمینار د جوړېدو خبر ورکړ او ویې ویل: "موږ پلان لرو چې د هرات پوهنتون له ریاست سره په ګډه، د امارتي ادارو مسوولینو ته د چاپېریال ساتنې په اړه یو سیمینار جوړ کړو."
حافظ محمد بشیر مجاهد، د پوهنتون مالي او اداري مرستیال، د چاپېریال ساتنې ریاست له همکاریو مننه وکړه او ویې ویل: "موږ نیت لرو چې سږکال د ولایت مقام او د چاپېریال ساتنې ریاست په همکارۍ، ۲۵ زره نیالګي د ماسټر پلان له مخې، د طب پوهنځي، کادري روغتون او د پوهنتون په نورو سیمو کې کښېنوو، چې الحمدالله نن دا بهیر پیل شو او ټاکل شوې ده چې په راتلونکو ورځو کې دوام ومومي."
هغه همداراز ژمنه وکړه چې د چاپېریالي سیمینار په برخه کې به هر ډول همکاري کوي.
