د سیرت النبي صلی الله و علیه وسلم د سیالۍ پای غونډه
د سیرت النبي صلی الله و علیه وسلم د سیالۍ پای غونډه د هرات پوهنتون د رئیس پوهندوی عبدالعزیز نعماني، د لوړو زده کړو وزارت ځانګړي استازي او د هرات پوهنتون مالي او اداري چارو مرستیال مولوي منت الله آخندزاده، د هرات پوهنتون د اړیکو او عامه پوهاوي آمر محمدناصر مستنیر، د نارینه محصلینو د لیليې عمومي مدیر میرویس رحیمي، د لیلیې د امر بالمعروف او فرهنګي کمېټو غړو او د لیلیې د ګڼ شمېر محصلینو په ګډون د مولانا جامي سالون کې چې په شرعیاتو پوهنځې کې واقع دی ترسره شوه.
غونډه د قرآنکریم د مبارکو آیاتونو په تلاوت سره پیل او وروسته د هرات پوهنتون رئیس پوهندوی عبدالعزیز نعماني د یادې سیالۍ د جوړوونکو څخه د منندوینې ترڅنګ د رسول الله صلیالله علیه و سلم د ستر شخصیت او دده د سیرت بېلا بېلو خواوو ته اشاره وکړله او محصلین یې د پاک رسول صلی الله علیه و سلم د سیرت هر اړخیزه متابعت ته وهڅول.
وروسته د لوړو زده کړو وزارت ځانګري استازي او د هرات پوهنتون مالي او اداري چارو مرستیال په ورځني ژوند کې د رسول الله صلی الله علیه و سلم د سیرت څخه د اطاعت په اړه او د رسول الله صلی الله علیه وسلم د ستر شخصیت سره د محصلینو د لا پیژندګلوۍ په اړه خبرې وکړې او دا یې هم په ډاګه کړله چې د پوهنتون او دیني مدارسو ترمنځ باید اړیکي مینځ ته راشي او قوي شې او ټینګار یې وکړ چې داسې سیالۍ به راتلونکې کې د دیني مدارسو د طلابو او د محصلینو ترمینځ ترسره شې، مولوي آخندزاده په پاۍ کې محصلینو ته دا سپارښتنه وکړله چې دوی دې په خپل ژوند کې کوښښ وکړي چې خپلې ټولنې ته په غوره بیلګو او نمونو باندې بدل شې.
د غونډې په دوام کې د لیلیې د فرهنګي کمیټې غړي قاري عبدالوحید محمدي د دې سیالۍ د جوړیدو د موخې په اړه او په ټولنه کې د محصلینو د علمي او کلتوري رول په اړه خبرې وکرې.
وروسته د لیلیي د فرهنګې کمیټې بل غړي محمدعوض دانیال حاضرینوته د ښه راغلاست ترڅنګ د یادې سیالۍ پایلې اعلان کړې او د پوهنتون د رهبري هیئت او د نورو مېلمنو په ګډون یې د سیالۍ ممتازو محصلینوته جوایز او ستاینلیکونه وړاندي کړل.
دا سیالي د لیلیې د محصلینو د امر بالمعروف او فرهنګي کمیټو په نوښت او د لیلیې د مدیریت په همکارۍ د تلې د میاشتې په ۲۳ نېټه د ګڼ شمېر محصلینو په ګډون کې ترسره شوه.
غونډه په دعا سره پای ته ورسېدله.