*د لومړي ځل لپاره د هرات پوهنتون په کادري روغتون کي د (Hernia) چوره ناروغۍ جراحي عمليات په برياليتوب سره ترسره سو!*

د هرات پوهنتون په کادري روغتون کي د متخصصو ډاکټرانو په مرستې سره د لومړي ځل لپاره د (Hernia) چوره په نوم عمليات ترسره سول.

په همدې مناسبت جوړه سوې غونډه کي د هرات پوهنتون رئیس شيخ عبدالغني حقاني، مالي او اداري مرستيال مولوي غلام رسول سروري، د کادري روغتون رئیس ډاکټر ذبيح الله اميد، د طب پوهنځي رئیس پوهندوی ډاکټر شفيق احمد جويا، د طب پوهنځي استادانو، د ياد روغتون متخصصانو، ستاژرانو او يو شمېر نورو مېلمنو ګډون درلود.

ددې لاستې راوړني په مناسبت د هرات پوهنتون رئیس شيخ عبدالغني حقاني د عملياتو د پېل په تړاو د لوړو زده کړو وزارت او د هرات ولايت مقام او د کادري روغتون د رئيس او د متخصصو کادرونو   د هڅو او ملاتړ څخه مننه او قدرداني وکړه، نوموړي زياته کړه چي د ( هرات پوهنتون او کادري روغتون لپاره دا نه يوازي يو لوی ګام دی، بلکي د روغتيايي خدمتونو په وړاندي کولو کي يوه مهمه لاسته راوړنه ده، دا ددې علمي بنسټ د مسلکي ظرفيت نښه هم ده؛ ځکه د همدې روغتون پر بنسټ به خلکو ته غوره او ارزښتناک روغتيايي خدمات وړاندي سي).

هغه په خپلې وينا کي زياته کړه چي (د افغانستان اسلامي امارت تل په دې هڅه کي دی، چي خپل افغان شريف ولس ته د روغتيا په برخه کي د ځوان متخصص او ژمن کادرونه کوم چي ددې خاوري راتلونکي هيلي دي، د هغوی د علم، تخصص او نه ستړي کېدونکو هڅو پر مټ اړين روغتيايي خدمتونو وړاندي کړي او افغانانو ته يوه سالمه ټولنه ډالۍ کړي).

د ياد کادري روغتون رئیس ډاکټر ذبيح الله اميد ددغې لويې لاسته راوړني په پار د هرات شريف ولس، د روغتون ډاکټرانو او ستاژرانو ته مبارکي وويل او د پوهنتون د رئیس، مالي او اداري معاونيت، طب پوهنځی رئیس او د روغتون متخصصو د هڅو او همکاريو څخه مننه وکړه، هغه زياته کړه چي کادري روغتون رهبري به تل دا هڅه کوي چي ولس ته د ښه خدمت تر څنګ د طب پوهنځي ستاژرانو ته تخصصي پوهه هم وليږدوي.