د هرات پوهنتون د فعالیتونو او لاستهراوړنو کتاب چاپ شو
د هرات پوهنتون د نشراتو او عامه اړیکو آمریت د دې علمي بنسټ د فعالیتونو، پروګرامونو او لاستهراوړنو د ثبت، مستندسازۍ او انعکاس په موخه د «د هرات پوهنتون فعالیتونه او لاستهراوړنې» تر سرلیک لاندې یو کتاب ترتیب او چاپ کړی دی.
په دغه کتاب کې د هرات پوهنتون د محترم ریاست، معاونیتونو، پوهنځیو او بېلابېلو څانګو مهم فعالیتونه او لاستهراوړنې په منظم ډول راټولې او وړاندې شوې دي. دغه اثر د هرات پوهنتون د علمي، ښوونیزو، څېړنیزو، فرهنګي او اداري فعالیتونو، هڅو او پرمختګونو روښانه انځور وړاندې کوي.
د هرات پوهنتون د نشراتو او عامه اړیکو آمر مولوي محمد ناصر مستنیر وايي: «موږ تل هڅه کوو چې د دغه علمي بنسټ علمي، ښوونیز، څېړنیز او بنسټیز فعالیتونه، پروګرامونه او لاستهراوړنې په منظم او دقیق ډول راټول، مستند او منعکس کړو. زموږ موخه دا ده چې د هرات پوهنتون هڅې او بریاوې د کتابونو، بروشورونو او مجازي رسنیو له لارې د عامو خلکو تر لاسو ورسوو.»
