د کيفيت د تضمين او اعتبارورکونې د چوکاټ اوعلمي پروګرامونو زده کړه ييز ورکشاپ جوړشو.
د هرات پوهنتون د رئيس پوهندوی عبدالعزيز نعماني، په هرات کې د لوړو زده کړو وزارت ځانګړي استازي او هرات پوهنتون مالي چارو او اداري مرستيال مولوي منت الله آخندزاده، د پوهنتون د محصلانو چارو مرستیال پوهندوی غلام حضرت حساس، د لوړو زده کړو بنسټونو د کيفيت د تضمين او اعتبارورکونې آمر صفت الله حامد، د کيفيت د تضمين او اعتبارورکونې رياست د بورډ غړي دوکتور محمد ظريف شريفي، د هرات پوهنتون او غور، بادغيس، فراه او نيمروز ولايتونو د لوړوزده کړو مؤسسو د کيفيت د تضمين آمرانو او د هرات ولايت د خصوصي لوړو زده کړو بنسټونو د کيفيت د تضمین د مسؤلينو په ګډون، نن د کيفيت د تضمين او اعتبارورکونې د چوکاټ اوعلمي پروګرامونو زده کړه ييز ورکشاپ، د هرات پوهنتون د علمي څېړنو د کنفرانسونو په سالون کې جوړشو.
ناسته د الهي کلام د څو مبارکو آيتونو په تلاوت سره پيل شوه. وروسته د هرات پوهنتون رئيس پوهندوی عبدالعزيز نعماني ميلمنو ته د ښه راغلاست ترڅنګ، د کيفيت د تضمين او اعتبار ورکونې پروګرامونو ته د لوړو زده کړو وزارت له پاملرنې څخه مننه وکړه او دعلمي ارزښتونو د پرمختيا، لوړوالي او پراختيا په اړه یې خبرې وکړې.
د هرات پوهنتون رئيس يوځل بیا د کيفيت د تضمين د معیارونو رعايت ته پاملرنه مهمه وبلله او د ورکشاپ له ګډونوالو څخه یې وغوښتل، چې پخپلو تحصيلي بنسټونوکې د کيفيت د ښه والي لپاره پوره پاملرنه وکړي.
ورپسې د کيفيت د تضمين او اعتبارورکونې رياست د بورډ غړي دوکتور محمد ظريف شريفي د کيفيت د تضمين او اعتبارورکونې د پروګرامونو په اړه وينا وکړه ویې ويل: د لوړو زده کړو په برخه کې له بنسټيز شاخصونوڅخه یوهم پوهنتونونوته اعتبارورکونه ده؛ په دې لاره کې پوهنتونونو او لوړو زده کړو بنسټونو ته په کاردی چې د خپلو علمي فعاليتونو د دوام لپاره د کيفيت د تضمين معيارونه رعايت او خپل علمي اعتبار لاسته راوړي.
د يادولو وړده چې دغه ورکشاپ به د درېیو ورځو په لړکې په هرات پوهنتون کې جوړيږي.
