د هرات پوهنتون د څېړنو او علمي مجلې د معاونیت د څېړنې د شورا غونډه ترسره شوه.
د هرات پوهنتون د څېړنو او علمي مجلې د معاونیت د څېړنې د شورا غونډه د یاد معاونیت د غونډو په تالار کې ترسره شوه. دا غونډه د قرآن عظیمالشان د مبارکو آیتونو په تلاوت سره پیل شوه.
په پیل کې، د هرات پوهنتون علمي معاون او د ارزونې مسؤل، مفتي هدایتالله منیب، د وینا پر مهال په پوهنتونونو او تحصیلي بنسټونو کې د څېړنې پر مقام او اهمیت خبرې وکړې او څېړنه یې د علمي پرمختګ، د ټولنې د ستونزو د حل او د لوړو زدهکړو د کیفیت د لوړولو اساسي ستنه وبلله. نوموړي زیاته کړه: څېړنه د کلتور پراختیا د علم تولید، د استادانو او محصلانو د علمي وړتیاوو پیاوړتیا او په ملي او نړیواله کچه د پوهنتونونو د مقام د لوړوالي لامل ګرځي.
وروسته، پوهندوی دوکتور نورعلي مهمند، د څېړنو او علمي مجلې معاون، د څېړنې د شورا د تېرې غونډې راپور وړاندې کړ او د څېړنو په برخه کې د استادانو د لا پراخې همکارۍ او د معیاري علمي مقالو د لیکلو غوښتنه یې وکړه.
له هغې وروسته، په ترتیب سره پوهندوی دوکتور غلاممحمد قانت، د علمي څېړنو آمر، او پوهندوی دوکتور محمدنعیم مسلم، د علمي مجلې آمر، د خپلو اړوندو آمریتونو د فعالیتونو او لاسته راوړنو راپورونه غونډې ته وړاندې کړل.
د دې ناستې په وروستۍ برخه کې، د ترانسپورت او ښاري ګڼهګوڼې په برخه کې د کنفرانس د جوړولو په اړه هر اړخیز او جامع بحث وشو او پرېکړه وشوه چې د یوه ملي کنفرانس د جوړولو له لارې به په دې برخه کې علمي لارې چارې او حللارې مطرح شي، او د دغو مقالو ټولګه به د ځانګړې ګڼې تر سرلیک لاندې د څېړنو او علمي مجلې د معاونیت له خوا چاپ ته وسپارل شي.
د غونډې په پای کې، د ټولنیزو علومو، انجینري او عامه ادارې او پالیسۍ پوهنځیو د تحقیق کمېټو ته، او همدارنګه د علمي څېړنو د آمریت د څېړنې او ارزونې کمېټې استازو ته ستاینلیکونه ورکړل شول.
