د هرات پوهنتون د انجنيري پوهنځي ممتازو او جديد الشمول محصلانو معرفت غونډه ترسره سوه
د هرات پوهنتون د انجنيري پوهنځي د خپلو ممتازو او جديد الشمول محصلانو د ستايني او ښه راغلاست په مناسبت غونډه ترسره سوه، چي د محصلانو چارو مرستيال شيخ عبدالهادي ذوالهادي، د پوهنځيو رئيسانو، انجنيري پوهنځي رئیس، استادانو او محصلانو پکښي ګډون درلود.
دا غونډه د قران کريم د څو مبارکو آيتونو په تلاوت سره راپيل سوه، چي بیا د انجنيري پوهنځي رئيس پوهنمل انجنير پاڅون عارفي له لوري د غونډي ټولو ګډون والو ته ښه راغلاست ويلو تر څنګ د ممتازو محصلينو ستاينه يې وکړه.
د محصلانو چارو مرستيال شيخ عبدالهادي ذوالهادي د علمي بنسټونو د ارزښت، د هڅو او خلاقيت پر اهميت، د پوهنتون د اسلامي، علمي او اخلاقي اصولو او نظم ساتلو همدارنګه خپل صورت او سيرت پر ښه سمون باندي خبري وکړلې او نوموړي زياته کړه چي د هرات پوهنتون مشرتابه تل هڅه کوي، ترڅو محصلانو ته غوره علمي امکانات برابر کړي.
همدارنګه د انجنيري پوهنځي د دو تنو استادانو پوهندوی انجنير غلام فاروق نديم او پوهنيار نعمان محب له لوري پر ستراتيژيک پلان، کريډيټ لايحې او په علمي چاپيريال کي پر نظم او ډسپلين مراعت کولو باندي خبري وکړې.
