د مخدره توکو په وړاندې د مبارزې يو ورځنی سیمينار
د هرات پوهنتون د ظرفیت د لوړولو او انکشاف عمومي مديريت د ادارې او پاليسي عامه پوهنځي په همغږۍ سره د مخدره توکو په وړاندې د مبارزې سيمينار د هرات پوهنتون اداري پرسونل او د اسلامي امارت د نورو ادارو کارکوونو ته وړاندې کړ.
په دې سيمينار کې د هرات پوهنتون رئيس شيخ الحديث ابوالحکمت مفتي عبدالغفار، علمي مرستيال محمد موسی فایق، اداري مرستيال ملا انعام الله انعام، د ادارې عامه پوهنځي رئيس پوهنمل دوکتور حفيظ الله جواد او نورو ګډون کړی وو.
په پيل کې يې د هرات پوهنتون رئيس شيخ الحديث ابوالحکمت مفتي عبدالغفار د دې سيمينار له جوړوونکو څخه د مننې ترڅنګ دا سيمينار د لوړو زده کړو د تحصلي مؤسسو او بنسټونو مسؤوليت وګاڼه، تر څو له دې هغه ټول ضررونه چې ټولنې ته مخامخ دي، مخنيوی يې وشي. ده د قران کريم د څو مبارکو ايتونو په لوستلو سره وويل چې انسان الله تعالی د خپل عبادت لپاره خلق کړی دی، نو هغه شيان چې د ده د عبادت په لاره کې خنډ جوړېږي، ټول منکرات دي او د هغوی په وړاندې بايد مبارزه وشي.
د هرات پوهنتون رئيس شيخ الحديث ابوالحکمت مفتي عبدالغفار يو ځل بيا د دې سيمينار له جوړونکو څخه مننه وکړه او له ګډون والو څخه يې وغوښتل چې د دې سيمينار محتويات له نورو سره هم شريک کړي.
په دوام يې د طب پوهنځي استاد پوهنيار احمد جاويد يوسفزي د مخدره توکو په زيان، اثراتو، عواملو او د هغوی په وړاندې د مبارزې په څرنګوالي خبرې وکړې.
