د هرات پوهنتون او افغان ملي بانک ترمنځ د همکارۍ هوکړهلیک لاسلیک شو.
نن د هرات پوهنتون د عمومي رئیس مفتي عبدالستار المحسن، د پوهنتون د مرستیالانو او د افغان ملي بانک د استازي په شتون کې د بانکي خدمتونو د ښه والي، چټکتیا او اسانتیا په موخه د همکارۍ هوکړهلیک لاسلیک شو.
د دغه هوکړهلیک موخه د هرات پوهنتون د منسوبینو او مراجعینو لپاره د بانکي خدمتونو برابرول، د منسوبینو د معاشونو او محصلینو د بدل اعاشې ورکړه او د لا زیاتو اسانتیاوو رامنځته کول دي.
د دغه هوکړهلیک له مخې افغان ملي بانک ژمنه کړې چې اغېزمن بانکي خدمتونه وړاندې کړي، د حسابونو مدیریت ترسره کړي، د معاشونو او د بدل اعاشې په ورکړه کې اسانتیاوې رامنځته کړي، د پوهنتون په محوطه کې یو پایه ATM دستګاه نصب او فعاله کړي او د پوهنتون له مالي برخې سره تخنیکي او مسلکي همکارۍ ترسره کړي.
هرات پوهنتون هم ژمنه کړې چې د بانک د نمایندګۍ د فعالیت لپاره لازم زمینه برابره کړي او د دغه هوکړهلیک د موادو د اغېزمن تطبیق لپاره به لازمه همکاري وکړي.
