د آزادو سوداګریزو سیمو په اړه د علمي څېړنې وړاندې کول
د هرات ولایت د مقام له لوري د دې ولایت د متخصصینو، څېړونکو او علمي ظرفیتونو د ملاتړ په موخه د هرات پوهنتون د انجینري پوهنځي استاد پوهندوی دوکتور غلام فاروق ندیم، د آزادو سوداګریزو سیمو د رامنځته کولو په اړه خپله علمي څېړنه د هرات ولایت د والي شیخ مولانا اسلامجار او یو شمېر نورو د نظرانو نظر خاوندانو په شتون کې وړاندې کړه.
په دې علمي ناسته کې د هرات والي، د امارتي ادارو یو شمېر رئیسانو، د هرات پوهنتون د علمي څېړنو مرستیالۍ، د صنعت او سوداګرۍ خونې رئیسانو، د خصوصي سکتور کارپوهانو او د دولتي او خصوصي پوهنتونونو یو شمېر استادانو ګډون کړی و. په ناسته کې د آزادو سوداګریزو سیمو د ونډې، اقتصادي ودې، د سوداګرۍ د پراختیا او د پانګونې د راجلبولو په اړه د ترسره شوې څېړنې موندنې وڅېړل شوې او پرې بحث وشو.
په دې څېړنه کې د آزادو سوداګریزو سیمو د رامنځته کولو ګټې او زیانونه، قوتونه او کمزورۍ، فرصتونه او ننګونې و ارزول شوې او د موضوع بېلابېل اړخونه په تخنیکي ډول تر څېړنې او ارزونې لاندې نیول شوي دي.
د هرات والي شیخ مولانا اسلامجار د یادې علمي څېړنې هرکلی وکړ او د پرېکړو کولو او اقتصادي پراختیا په بهیر کې یې د څېړونکو او پوهنتونونو د استادانو د علمي او تخصصي ظرفیتونو پر کارولو ټینګار وکړ.
همدارنګه اړوندو مسئولینو ته لارښوونه وشوه چې د آزادو سوداګریزو سیمو د رامنځته کولو موضوع په لا زیات دقت وڅېړي، اړینې څېړنې ترسره کړي او د مطالعاتو له بشپړېدو وروسته خپلې مشخصې پایلې او وړاندیزونه د ولایت مقام ته وړاندې کړي، ترڅو په راتلونکو پړاوونو کې دغه طرحه د پرېکړې لپاره د اسلامي امارت محترمې کابینې ته وړاندې شي.
په پای کې پوهندوی دوکتور غلام فاروق ندیم د هرات ولایت والي شیخ مولانا اسلامجار له لوري د نوموړې علمي څېړنې د وړاندې کولو په پار وستایل شو.
