د دیني تخصصاتو او جامعاتو ریاست د بیا جوړونې پروژه پرانیستل شوه.
د هرات ولایت د دیني تخصصاتو او جامعاتو ریاست د بیا جوړونې پروژې د پرانیستنې مراسم نن د الهي کلام د آیتونو په تلاوت او د هرات پوهنتون رئیس شیخ الحدیث ابوالحکمت مفتي عبدالغفار، د هرات پوهنتون مالي او اداري مرستیال ملا انعام الله انعام، د دیني تخصصاتو او جامعاتو رئیس مفتي تاج محمد صهیب، د دیني تخصصاتو او جامعاتو ریاست اداري او مالي مرستیال مفتي عبدالقادر نعماني، د اداري کارکوونکو او ددې ریاست د بیا جوړونې پروژې د قرارداد کوونکي شرکت د مسئولینو په حضور دایر شول.
د هرات پوهنتون رئیس شیخ الحدیث ابوالحکمت مفتي عبدالغفار د دیني تخصصاتو او جامعاتو ریاست ته خدمت کول له دیني مسئولیتونو څخه وبلل ځکه چې دا ریاست په دیني علومو کې د متخصصو کسانو د روزلو او د اسلامي فرهنګ د ترویج کولو په برخه کې ټولنې ته لوی خدمت کوي.
د هرات پوهنتون رئیس د قرارداد کوونکي شرکت له مسئولینو څخه هم وغوښتل چې ورسپارل شوي کارونه په امانت او رښتینولۍ سره مخته یوسي.
وروسته د هرات ولایت د دیني تخصصاتو او جامعاتو ریاست اداري او مالي مرستیال مولوي عبدالقادر نعماني د دې ریاست د قراردادونو د تړون او د برنامو د ریپوټ وړاندې کولو ترڅنګ، وویل چې د دیني تخصصاتو اوجامعاتو ریاست اداري مسئولین به د دې پروژې په بشپړ او روښانه توګه مخته وړلو کې له هیڅ ډول هڅې او کوښښ څخه ډډه ونه کړي.
ورپسې د مېلمنو په حضور د دیني تخصصاتو او جامعاتو د بیا جوړونې پروژه پرانیستل شوه.
