د هرات پوهنتون رئیس له اداري برخو د آمرینو او مدیرانو سره تعارفي لیدنه
د هرات پوهنتون رئیس، مفتي عبدالستار المحسن د مالي او اداري چارو مرستیال حافظ محمد بشیر مجاهد په شتون کې له اداري برخو د آمرینو او مدیرانو سره تعارفي لیدنه ترسره کړه.
غونډه د قرآن کریم د مبارکو آیتونو په تلاوت پیل شوه. وروسته د هرات پوهنتون رئیس زیاته کړه چې د دې لیدنې موخه د اداري مسئولیتونو روښانه کول او د دندو پر سم او اغېزمن ډول ترسره کولو ټینګار دی. نوموړي زیاته کړه: «هغه مسئولیت چې موږ او تاسو ته سپارل شوی، یو امانت دی چې باید په غوره ډول ترسره شي او موږ ټول به د الله تعالی پر وړاندې د هغه په اړه ځواب ویونکي یو.»
هغه د پوهنتون د چارو په پرمختګ کې د آمرینو او مدیرانو مهم رول ته په اشارې وویل: د پوهنتون رهبري تل د خپلو کارکوونکو ترڅنګ ولاړه ده او له هغوی څخه ملاتړ کوي. نوموړي همداراز د قومي، ژبني او سمتي تعصبونو پر پرېښودو، له ناسالمو سیالیو څخه پر ډډه کولو، د یووالي، اتفاق او همکارۍ د روحیې پر پیاوړتیا او د اسلامي شریعت او افغاني فرهنګ په چوکاټ کې د نوښت او خلاقیت پر ترویج ټینګار وکړ.
د هرات پوهنتون رئیس د ظاهر او باطن اصلاح، په دندو کې اخلاص، د چارو له ځنډ پرته ترسره کول، د اداري مکتوبونو په لیکنه کې د اصولو او مقرراتو رعایت او د مسئولیتونو پر وړاندې مسئولیتپزي د بریالۍ خدمترسونې له مهمو بنسټونو څخه وبلل.
ورپسې د هرات پوهنتون د مالي او اداري چارو مرستیال حافظ محمد بشیر مجاهد، د کارکوونکو ترمنځ د همکارۍ او همغږۍ، امانتدارۍ، د چارو د تعقیب او څارنې، له مراجعینو سره د نیک او مناسب چلند، د مافوق آمرینو د لارښوونو د اطاعت او په دندو کې د صداقت او ژمنتیا په اړه وینا وکړه.
