د هرات پوهنتون د تدريسي روغتون روغتيايي خدمتونه
د هرات پوهنتون تدريسي روغتون په تېره يوه مياشت کې مراجعينو ته پراخ روغتيايي او تشخيصي خدمتونه وړاندې کړي دي.
په دې موده کې، ياد روغتون توانېدلی چې له ۵۰۶۶ څخه زياتو مراجعينو ته په بېلابېلو څانګو کې روغتيايي خدمتونه وړاندې کړي. د مراجعينو تر ټولو لوړه شمېره د بستر څخه بهر ناروغانو (سرپايي) څانګې پورې اړه لري چې شمېر يې ۳۱۴۴ تنو ته رسېږي. همدارنګه، د التراسوند، سېرولوژي، بایوکیمیا، ای سي جي، ساده ټېسټونو، بستر او بېلابېلو عملیاتو څانګو هم ګڼ شمېر ناروغانو ته خدمتونه وړاندې کړي دي.
د تدريسي روغتون مسؤولين دغه خدمتونه د ډاکترانو، روغتيايي او اداري کارکوونکو د پرلهپسې هڅو څرګندونه بولي او د معیاري خدمتونو پر دوام، د ناروغانو ښه پاملرنې او مراجعینو ته د لا ډېرو اسانتیاوو پر برابرولو ټینګار کوي.
