د هرات پوهنتون د عامه ادارې او پالیسۍ پوهنځي د مرکزي کتابتون او د کنفرانسونو تالار پرانیستل شول
نن د هرات پوهنتون د عامه ادارې او پالیسۍ پوهنځي د مرکزي کتابتون او د کنفرانسونو تالار د شیخ القرآن والحدیث مولانا عبدالغني حقاني، د هرات پوهنتون رئیس، ډاکټر علي اوزګون اوزتورک، د ترکیې د منځنۍ آسیا او قفقاز دفتر رئیس، ډاکټر بلال امراء، په افغانستان کې د ترکیې د سفارت مستشار، ډاکټر عرفات دنیز، په هرات کې د ټيکا دفتر رئیس، د پوهنتون مرستیالانو، د پوهنځیو رئیسانو او نورو مهمانو په حضور کې پرانیستل شو.
په پیل کې، د هرات پوهنتون رئیس، شیخ القرآن والحدیث مولانا عبدالغني حقاني حفظه الله، مېلمنو ته د ښه راغلاست ویلو ترڅنګ، د ټيکا دفتر له همکارۍ مننه وکړه، چې د مرکزي کتابتون او د عامه ادارې او پالیسۍ پوهنځي د کنفرانسونو تالار یې سمبال کړ. هغه ټینګار وکړ چې ترکیه تل د افغانستان د ملت تر څنګ ولاړه ده او په بېلابېلو برخو کې یې ارزښتناکې همکارۍ کړي دي.
ورپسې، ډاکټر علي اوزګون اوزتورک، د منځنۍ آسیا او قفقاز دفتر رئیس، وویل: "پوهنتونونه د علم او پوهې مرکزونه دي، او موږ باید په دغو ادارو کې اساسي پروژې عملي کړو. خوشبختانه، موږ د دې پوهنتون لپاره دوه مهمې پروژې، چې د مرکزي کتابتون او د امیر علي شیرنوایي کنفرانسونو تالار سمبالول شامل دي، بشپړې کړې. موږ به په راتلونکي کې نورې پروژې هم تطبیق کړو."وروسته، ډاکټر بلال امراء، په افغانستان کې د ترکیې د سفارت مستشار، د افغانستان د لوړو زده کړو په مؤسسو کې د بېلابېلو پروژو د تطبیق ستاینه وکړه او ویې ویل: "موږ تل هڅه کړې چې په پوهنتونونو کې د انکشافي پروژو پلي کولو ته دوام ورکړو، او خوشاله یو چې د فراه، بادغیس، او هرات پوهنتونونو په لوړو زده کړو مؤسسو کې مو ګڼ شمېر مهمې پروژې عملي کړي دي."
بیا، ډاکټر حفیظ الله جواد، د عامه ادارې او پالیسۍ پوهنځي رئیس، د ټيکا دفتر له همکاریو مننه وکړه او ویې ویل: "افغانستان او ترکیه ګډه کلتوري شتمني لري، او موږ تل د خپل دوست او ورور هېواد ترکیې له ارزښتناکو همکاریو څخه منندوی یو."
په پای کې، د ټيکا دفتر رئیس او د منځنۍ آسیا او قفقاز دفتر رئیس ته د یادګار په توګه د هرات پوهنتون له لوري ستاینلیکونه ورکړل شول.
