جلسه اداری
نن د هرات پوهنتون مالي او اداري مرستیال ملا انعام الله انعام، د اداري برخې آمرانو او مدیرانو په حضور د پوهنتون د اداري چارو دمخته وړلو او ښه والي په پار غونډه دایره شوه. غونډه د الهي کلام د ایاتونو په تلاوت سره پیل شوه او وروسته د پوهنتون مالي او اداري مرستیال ملا انعام الله انعام په هرات ولایت کې د اخیرنۍ زلزلې شهداوو ته د اتحاف دعا کولو او د دې پښې ټپیانو ته د بیړنۍ روغتیا غوښتلو تر څنګ، د اداري کارکوونکو د فعالیتونو او په وخت حضور څخه مننه وکړه؛ لازم هدایات او لارښوونې یې وړاندې کړې، د ریښتینولۍاو ژمنې د ارزښت او په ښه توګه د اداری چارو پرمخ وړلو په اړه خبرې وکړې وه یې ویل: په وخت سره د اداري چارو ترسره کول او هغو ته رسیدګي کول د خدمتونو د وړاندې کولو په پار د هرې ادارې له اصولو څخه شمېرل کېږي او د پوهنتون اداري کارکوونکي هو مکلف دي چې په دې برخه کې د هیڅ ډول هڅې او کوښښ څخه ډډه ونه کړي. هغه ټینګار وکړ چې اداري آمران باید خپل اونیز ریپوټونه د دې معاونیت په لاسرس کې ورکړي تر څو د چارو د بهیر له څرنګوالي څخه په واضح او روښانه ډول کتنه وشي او د چالشونو او ستونزو لپاره مناسبې د حل لارې پیدا شي. ورپسې د اداري برخو آمرانو او مدیرانو د فعالیتونو او لاسته راوړنو د ریپوټونو وړاندې کولو او د ستونزو او د حل لارو د بیانولو ترڅنګ، ژمنه وکړه تر څو له مخکې ټاکل شویو موخو ته د لاسرسي او په خپل وخت د اړوند چارو د مخته وړلو په برخه کې به لازم او عملي اقدامات په لاس کې ونیسي.
