د مقالې لیکلو سیالۍ کې ګټونکو او ممتازو محصلینو ته د تقدیر او ستاینې محفل

د مقالې لیکلو سیالۍ کې ګټونکو او ممتازو محصلینو ته د تقدیر او ستاینې محفل.
د پوهنتون د محصلینو چارو مرستیال  پوهندوی غلام حضرت حساس، د حقوق او سیاسي علومو پوهنځي رئیس پوهنمل رحمت الله حسني، د استادانو او محصلینو په حضور د مقالې لیکلو سیالۍ ګټونکو او ممتازو محصلینو څخه د تقدیر او ستاینې مراسم د دې پوهنځي د کنفرانسونو په سالون کې دایر شول.
مراسم د الهي کلام د آیتونو په تلاوت سره پیل شول او وروسته د حقوقو او سیاسي علومو پوهنځي رئیس رحمت الله حسني مېلمنو ته د ښه راغلاست ویلو ترڅنګ، د محصلینو هڅې، د عالي نومرو لاسته راوړلو په پار د قدر وړ وبللې  او هغو محصلینو چې د مقالې لیکلو په سیالۍ کې ګډون کړی و او لومړی، دویم او دریم  مقامونه یې خپل کړي وو مبارکي وویله.
ورپسې، د هرات پوهنتون د محصلینو چارو مرستیال پوهندوی غلام حضرت حساس  هم په دې مراسمو کې له ګډون څخه د خوښۍ څرګندولو تر څنګ، د تحقیق او مقالې لیکلو د ارزښت په اړه خبرې وکړې، د لیکنې فنون او علومو زده کړې ته یې محصلین تشویق کړل.
د پوهنتون د حقوق او سیاسي علومو پوهنځي استاد پوهنمل جمشید نېک جو هم د دې برنامې له دایر کوونکو څخه مننه وکړه، ممتازو محصلینو او غوره مقاله لیکونکو ته یې مبارکي وویله.
همدارنګه هغۀ علمي مرکزونه د پوهې او زده کړې د تولید مراکز معرفي کړل چې پایله یې ټولنه د پرمختګ په لور برابروي.
په پای کې د مېلمنو په حضور هغه نفیسې ډالۍ او ستاینلیکونه چې د حقوقو پوهنځي د رهبري پلاوي له خوا په پام کې نیول شوي وو ممتازو او د مقالې لیکلو سیالۍ ګټونکو محصلینو ته وویشل شول.
ویل کېږي چې دا برنامه د حقوق او سیاسي علومو پوهنځي د فرهنګي کمیټې له خوا دایر شوه.
د هرات پوهنتون د عامه پوهاوي او اړیکو آمریت 
۲۰ محرم ۱۴۴۵- ۱۶ زمری ۱۴۰۲