د هرات پوهنتون مالي او اداري مرستیال غونډه وکړه
د هرات پوهنتون د مالي او اداري معاونیت ناسته د پوهنتون مالي او اداري مرستیال منتالله آخندزاده، د اداري برخو آمرانو او مدیرانو په حضور د دې معاونیت په دفتر کې تر سره شوه.
ناسته د الهي کلام د آیتونو په تلاوت سره پیل شوه وروسته ښاغلي آخند زاده د ناستې حاضرینو ته د ښه راغلاست او د اداري برخو مسؤولانو د کړنو څخه د اړوند چارو په مخ ته وړلو کې د قدرداني ترڅنګ، د تضمین کیفیت او اعتبار ورکولو برنامو په اړه خبرې وکړې،
او د امرانو او مدیرانو څخه یې وغوښتل چې په دې برخه کې زیاته پاملرنه وکړي او لازم چمتو والی ورته په پام کې ونیسي.
د پوهنتون مالي او اداري مرستیال د بشري منابع آمریت او د ظرفیت ارتقاء عمومي مدیریت ته لارښوونه وکړه چې د کار کوونکو د ظرفیت ارتقاء برنامې د ترسره کولو لاره په جدي توګه وڅاري او همدارنګه د لېسانس او ماسترۍ برنامو ته د پوهنتون کارکوونکو د معرفي کولو په برخه کې عملي اقدامات وکړي.
همدارنګه هغۀ د چالشونو او ستونزو په اړه خبرې وکړې، لازم هدایات او لارښوونې یې وړاندې کړې، وه یې ویل: د یوې ادارې د بریالیتوب اړین لاملونه د کارکوونکو ترمنځ همکاري او مرسته ده
ځکه چې د تجربو او مهارتونو د شریکولو لامل ګرځي او د یوې ادارې موخو ته د رسېدلو لاره هواروي.
د هرات پوهنتون د عامه پوهاوي او اړیکو آمریت
۱۶ ذوالحجه ۱۴۴۴ - ۱۴ چنګاش ۱۴۰۲
