د هرات پوهنتون د ژورنالیزم او عامه اړیکو پوهنځی له لوري علمي کنفرانس ترسره شو؛
د "د فیسبوک د استعمال پر محصلینو د کورنۍ په ارزښتونو د اغېز ارزونه" تر عنوان لاندې علمي-تحقیقي کنفرانس د ژورنالیزم او عامه اړیکو پوهنځي له لوري جوړ شو.
د دې نوې څېړنې پایلې، چې د هرات پوهنتون له ۳۶۰ محصلینو سره د ګډون په مرسته ترسره شوې، ښيي چې ۸۷.۲ سلنه ګډونوال هره ورځ لږ تر لږه له یوه تر دوو ساعتونو پورې فیسبوک کاروي.
د پام وړ خبره دا ده چې ۳۳.۳ سلنه محصلینو د فیسبوک د کارونې منفي اغېز پر خپلو کورنیو ارزښتونو "ډېر کم" ګڼلی دی. همدارنګه، ۳۳.۵ سلنه ځواب ویونکي باور لري چې د دې ټولنیزې شبکې د والدینو استعمال هم پر کورنیو ارزښتونو "ډېر لږ" اغېز کړی دی.
څېړنه ښيي چې ډېری محصلین له فیسبوک څخه د ساتیرۍ او د معلوماتو ترلاسه کولو لپاره کار اخلي او د کورنیو ارزښتونو پر جدي اغېز یې محدود باور لري.
د کورنۍ ارزښتونه هغه اصول، باورونه او دودونه دي چې د کورنۍ د غړو اړیکې او چلندونه تنظیموي او د هغوی ترمنځ د یووالي او همغږۍ په پیاوړتیا کې مهم رول لوبوي. دا ارزښتونه اکثراً د کورنۍ د کلتور، مذهب، دودونو او ګډو تجربو پر بنسټ جوړېږي.
