*د هرات د اسلامیه مدرسي د دستاربندۍ په مراسمو کې د شیخ القرآن والحدیث مولانا عبدالغني حقاني حفظه الله ګډون*
شیخ القرآن والحدیث مولانا عبدالغني حقاني حفظه الله، چې د هرات پوهنتون رئیس دی، په هغه مراسمو کې ګډون وکړ چې د هرات ولایت د اسلامیه مدرسې د فارغینو دستاربندۍ په مناسبت جوړ شوي وو. په دې مراسمو کې شیخ الحدیث مولانا نوراحمد اسلام جار، چې د هرات والي دی، هم ګډون کړی و. مولانا عبدالغني حقاني حفظه الله په خپلو خبرو کې د علم مقام، د علماوو رول، او د دیني مدرسو د فارغانو اهمیت په اسلامي ټولنه کې بیان کړ.
نوموړي په خپلو خبرو کې د اسلام په رڼا کې د علم اهمیت ته اشاره وکړه او د دیني علماوو هڅې یې د مؤمنو او ژمنو نسلونو په روزنه کې وستایلې. نوموړي د دیني مدرسو له استادانو مننه وکړه او وویل چې د مجاهدینو بریاوې او د هېواد د اشغال پای ته رسول د علماوو، فارغانو او د مجاهدپال ملت د ایمان، اخلاص او تقوا د هڅو پایله ده، چې د سعادت او استقلال لاره یې هواره کړه.
د هرات پوهنتون رئیس فارغانو ته سپارښتنه وکړه چې د لا زیاتو بریاوو لپاره باید خپلې علمي او عملي هڅې په اخلاص او تقوا سره ترسره کړي. مولانا حقاني حفظه الله پر علمي څېړنو او تألیف ټینګار وکړ او ویې ویل: "هر فارغ باید خپل ځانګړي اهداف وټاکي او د قوي ارادې او له تکبر او غرور څخه د ډډې کولو په وسیله د دې اهدافو د ترلاسه کولو لپاره هلې ځلې وکړي."
دغه مراسم چې د علماوو، استادانو، فارغانو او د هغوی د کورنیو په پراخه ګډون سره جوړ شوي وو، په ترڅ کې یې د فضیلت دستارونه د فارغانو پر سر کېښودل شول او د هغوی د بریا او پرمختګ لپاره دعاوې وشوې.
