د هرات پوهنتون د ملکیتونو نه لیدنه
د هرات پوهنتون ریس ابوالحکمت مفتی عبدالغفار په داسې حال کې چې د زراعت پوهنځي استاد او د کبانو د روزنې د فارم پخوانی مسؤل پوهندوی دکتور محمد جاوید پویش او د تدارکاتو امرینو هم ورسره ملګرتیا کوله، د پښتون پُل په سیمه کې د کبانو د روزنې فارم څخه چې د هرات پوهنتون له ملکیتونو څخه ګڼل کېږي، لیدنه وکړه.
د هرات پوهنتون اړوند دغه ملکیت د کبانو د روزنې فارم په نامه یادېږي او له ډېره وخته په هرات پوهنتون پورې اړه لري. دا فارم د هریرود سیند جنوب او د پښتون پله ختیځ او لویدیځ برخه کې موقعیت لري.
د کبانو د روزنې د دې فارم په لیدنه کې د هرات د کرنې او اوبو لګولو ریاست پخواني رئیس او د زراعت پوهنځي د کبانو روزنې د فارم پخواني روزونکي غلام نبي قانع د غونډې ګډونوالو ته معلومات وړاندې کړل.
وروسته د هرات پوهنتون رئیس د پوهنتون اړوند ملکیتونو ښې ساتنې په اړه مسؤلینو ته لارښوونې وکړې او هغوی ته یې وویل چې ډېر ژر د هرات پوهنتون اړوند ټول ملکیتونه د نورو ذیربطو ادارو سره په همغږۍ ثبت او د هرات پوهنتون په نامه کړئ! تر څو زده کړیالانو ته په هغو ساحو کې هم د څېړنو زمینه مساعده شي.
