د ۱۴۰۵ کال د اګزیت ازموینې د بریالیو او نخبګانو د ستاینې محفل ترسره شو
د هرات پوهنتون د ستوماتولوژۍ پوهنځي د ۱۴۰۵ کال د اګزیت ازموینې د بریالیو او نخبګانو د ستاینې محفل، د دې پوهنځي د علمي کادر د غړو، فارغانو او محصلانو په شتون کې ترسره شو.
دا پروګرام د قرآن کریم د څو مبارکو آیتونو په تلاوت سره پیل شو. ورپسې، پوهنیار ډاکټر ابوعلي لطیف، د ستوماتولوژۍ پوهنځي رئیس، فارغانو ته د مبارکۍ ترڅنګ د هغوی د هڅو، زیار او علمي ژمنتیا ستاینه وکړه او د علمي، مسلکي او ټولنیز خدمت په لاره کې یې ورته د لوی خدای له درباره د لا زیاتو بریاوو دعا وکړه.
په دوام کې پوهنمل ډاکټر عزیز عرفان، د تدریسي کلینیک آمر، د ستوماتولوژۍ د څانګې د اهمیت او د ټولنې د روغتیا د لوړولو په برخه کې د غاښونو د ډاکټرانو د رول په اړه وینا وکړه. هغه ټینګار وکړ چې د اګزیت ازموینې بریا د علمي او مسلکي مسؤلیتونو د یوه نوي پړاو پیل دی او باید د راتلونکي لپاره د لا لویو لاسته راوړنو زمینه برابره کړي.
همدارنګه پوهنیار ډاکټر زینالعابدین صدیقي، د پوهنځي د فرهنګي–ورزشي کمېټې مسؤل، فارغانو ته د ښه راغلاست ترڅنګ هغوی ته مبارکي وویله او له هغوی یې وغوښتل چې له پوهنځي سره خپل اړیکې او همکاري وساتي او د دې علمي بنسټ د ودې او پرمختګ لپاره خپله ونډه ادا کړي.
د پروګرام په یوه بله برخه کې یو تن فارغ د پوهنځي له رهبري څخه د مننې ترڅنګ د استادانو د هڅو، زړه سواندې لارښوونې او د محصلانو د هڅونې له امله قدرداني وکړه.
په پای کې، محفل د ۱۴۰۵ کال د اګزیت ازموینې د بریالیو او نخبګانو ته د تقدیرنامو په ویش او د خیر دعا په ویلو سره پای ته ورسېد.
