د هرات پوهنتون علمي شورا غونډه ترسره شوه
د هرات پوهنتون علمي شورا نن د شیخ القرآن والحدیث مولانا عبدالغني حقاني حفظه الله، د هرات پوهنتون رئیس، مرستیالانو، د پوهنځیو رئیسانو او نورو غړو په ګډون ترسره شوه.
غونډه د قرآن کریم د مبارکو آیتونو په تلاوت پیل شوه، ورپسې د پوهنتون رئیس شیخ القرآن والحدیث مولانا عبدالغني حقاني د غونډې ګډونوالو ته ښه راغلاست ووایه او علم او تحقیق یې د هرې ټولنې د پرمختګ او لوړتیا اساس وباله. هغه وویل: موږ باید د هرات پوهنتون فضا د راتلونکي متخصص نسل د روزنې لپاره په یوه غوره ځای بدله کړو، او په دې برخه کې د پوهنتون ټولو اړوندو کسانو همکاري ضروري ده.
په پای کې د غونډې غړو د استادانو د مقررۍ، منفکۍ او علمي ترفیع دوسیې وڅیړلې، او همدارنګه د هرات پوهنتون د ستوماتولوژۍ پوهنځي د خصوصي غالب پوهنتون او د هریوا خصوصي لوړو زده کړو موسسې د ستوماتولوژۍ پوهنځیو سره د همکارۍ د هوکړه لیکونو په اړه خبرې او نظریات تبادله کړل.
