د هرات پوهنتون علمي شورا دایره شوه
نن د هرات پوهنتون د علمي شورا ناسته د هرات پوهنتون رئیس پوهندوی مولوی عبدالعزیز نعماني، د علمي معاونیت سرپرست پوهنمل رحیم بخش فقیر یار، د محصلینو چارو مرستیال پوهندوی غلام حضرت حساس، د پوهنتون مالي او اداري مرستیال ملا انعام الله انعام، د پوهنتون د پوهنځیو د رئیسانو او استادانو په حضور د پوهنتون د علمي شورا د ناستو په سالون کې دایره شوه.
د هرات پوهنتون رئیس د دې آخیرنۍ میاشتې د فعالیتونو په اړه د خبرو کولو ترڅنګ، د طب پوهنځي د کادري روغتون پرانیستلو او دفعالیت د پیلولو په پار د هرات پوهنتون د برناموو په اړه معلومات ورکړل وه یې ویل: د طب، کمپیوټر ساینس او انجنیرۍ پوهنځيو د استادانو په همکارۍ، د روغتون د اړتیاوو او ضروریاتو لیست ترتیب شوی دی چې د هرات ولایت مقام او د ځینو نورو مرسته رسوونکو مرکزونو په همکارۍ د لازمو توکو او تجهیزاتو د پېرلو اقدام شوی دی.
د ناستې غړو هم د پوهنتون ریاست او د هرات ولایت له اخیرو اقداماتو څخه د کادري روغتون د چارو شروع کول د قدر وړ وبلل او د یاد روغتون پرانیستل یې د هرات علمي ټولنې ته یوه لویه لاسته راوړنه وبلله.
ورپسې د ناستې غړو د ناستې د اجنډا په اړه بحث او د نظریاتو تبادله وکړه او لازمې پرېکړې یې ونیولې.
د هرات پوهنتون د عامه پوهاوي او اړیکو آمریت
۵ صفر ۱۴۴۵ - ۳۱ زمری ۱۴۰۲
