د ساينس پوهنځي د محصلينو فراغت په يو لړ مراسمو سره ولمانځل شو.
د ساينس پوهنځي فرهنګي کمېټې د خپل پوهنځی د 57 محصلينو لپاره د فراغت جشن ونيو.
په دې مراسمو کې د هرات پوهنتون رئيس شيخ الحديث ابوالحکمت مفتي عبدالغفار، علمي مرستيال مولوي محمد موسی فایق، د محصلانو چارو مرستيال پوهندوی غلام حضرت حساس، د دعوت او ارشاد امر مولوي عبدالله طیب، د ساينس پوهنځي رئيس پوهنيار محمد اسماعيلي، استادانو او نورو محصلينو ګډون کړی وو.
دا مراسم د قران کريم په څو مبارکو ايتونو سره پيل شول، وروسته د ساينس پوهنځي رئيس محمد اسماعيلي فارغو محصيلينو ته د مبارکي ترڅنګ د علم او پوهې پر ارزښت خبرې وکړې، د محصلينو زحمتونو يې وستايل، هغوی ته يې وويل چې زده کړې پر دې ځای ونه دروئ، بلکې مخکې يې تر دوکتورا او ماسترۍ ورسوئ.
د غونډې په دوام د دعوت او ارشاد امر مولوي عبدالله طیب محصلينو ته د مبارکۍ ترڅنګ وویل چې تاسو د ټولنې الګو ياست، تاسو بايد پر دې علم او پوهې سره هغوی سمو اخلاقو ته وهڅوۍ، د هغوی راتلونکې روښانه کړئ.
وروسته د هرات پوهنتون رئيس شيخ الحديث ابوالحکمت مفتي عبدالغفار محصلينو ته مبارکۍ تر څنګ هغوی ته وويل چې هر ملت د ترقۍ او پرمختګ لپاره متعهدو او تحصيل کرده ځوانانو ته اړتيا لري. چې له نېکه مرغه دا اړتيا يې د هېواد بېلابېلو پوهنتونونو پوره کړې ده.
د هرات پوهنتون رئيس وويل چې محصلين په ځانګړې توګه فارغ شوي محصلين د اسلام سربازان دي، چې په خپلو وړتياوو سره يې کفار په ګونډو کړي دي. اميد دی چې تاسو هم خپلې وړتياوې وښيي.
د غونډې په دوام د دې پوهنځي استاد دکتور علي محمد محمدي محصلینو ته مبارکي ورکړه او د هغوی د ټولنيز مسؤوليت يادونه يې وکړه.
په دې غونډه کې د محصلينو په استازولۍ ذبيح الله امین د استادانو او د هرات پوهنتون له مشرتابه څخه مننه وکړه.
