د انجنیری او تکنالوژی دویم کنفرانس
د انجنیری او تکنالوژی دویم کنفرانس د هرات پوهنتون د رئیس پوهندوی عبدالعزیز نعماني، د لوړو زده کړو وزارت د فوق العاده استازي او د هرات پوهنتون مالي او اداري چارو مرستیال مولوي منت الله آخندزاده د ولایت مقام د سکتور رئیس، د متخصصانو د شورا رئیس ، د هرات ولایت د شاروالی رئیس، د هرات ولایت د علماوو د شورا استازي، د دولتي ادارو د رئیسانو، د پوهنځیو د رئیسانو، استادانو او د محصلینو په حضور کې د هرات پوهنتون د کرهنې پوهنځی د کانفرانسونو په سالون کې دایر او اجراء شو.
د دې کنفرانس د اجراء کولو موخه او هدف د معادن انجنیري عامه پوهاوی ، د معادنو د استخراج او د ډبرو میکانیکي خواص کوم چې په افغانستان کې شتون لري او په بین المللي بازارونو کې د هغې د ارزښت او ځای په اړه معلومات وړاندې کول وو .
دا کنفرانس د الله جل جلاله د څو مبارکو آیاتونو په تلاوت سره پیل شو او وروسته پوهندوی عبدالعزیز نعماني د هرات پوهنتون رئیس د مېلمنو د ښه راغلاست سره سره ددې کنفرانس د ترتیب کوونکو څخه هم قدر داني او مننه وکړه. د علمي تحقیقاتو په ارزښت او د هغوی د عملي کولو په اړه یې خبرې وکړې او ورپسې پوهنمل دوکتور امان الله فقیري د انجنیري پوهنځي استاد د خپل علمي کنفرانس په ارائه کې د ځینو ډبرو د فزیکي او میکانیکي خواصو د څېړنې په اړه کوم چې په افغانستان کې مطرح دي حاضرینو ته معلومات وړاندې کړل.
ورپسې استاد حامد سیرت د آسیا خصوصي لوړو زده کړو مؤسسې د انجنیری پوهنځی رئیس د معادنو د استخراج او راویستلو د بهیر په اړه حاضرينو ته معلومات وړاندې کړل.
همدارنګه د دې علمي کنفرانس تر څنګ د هرات پوهنتون د ریاست او د هرات شاروالي د ریاست تر منځ د همکارۍ تفاهم نامه لاسلیک شوه.