د هرات پوهنتون د علمي شورا غونډه ترسره شوه
د هرات پوهنتون د علمي شورا غونډه د شیخالقرآن والحدیث شیخ عبدالغني حقاني، د هرات پوهنتون د رئیس، د مرستیالانو، د پوهنځیو د رئیسانو او استادانو په ګډون ترسره شوه.
دا غونډه د کلام الله د مبارکو آیتونو په تلاوت سره پیل شوه. وروسته د هرات پوهنتون رئیس شیخ عبدالغني حقاني د مسلمانانو د وروسته پاتې والي په هکله خبرې وکړې او د هغې له مهمو لاملونو څخه یې د اسلامي ارزښتونو نه پاملرنه وبلله. نوموړي ټینګار وکړ چې د اصلي لارې ساتل، د یووالي او همغږۍ پیاوړتیا د ټولو له اساسي مسؤلیتونو څخه دي.
د پوهنتون رئیس همدارنګه د قوي عقیدې پیاوړتیا، د مسلکي پوهې لېږدل، د محصلینو اسلامي روزنې او د امیرالمؤمنین (حفظهالله تعالی) د فرمانونو په تطبیق ټینګار وکړ.
وروسته د علمي چارو مرستیال مفتی هدایتالله منیب د رئیس د خبرو تایید وکړ او د رسول الله صلی الله علیه وسلم په سنتو منګولو لګولو او د محصلینو د درسي کیفیت د ښه والي په اړتیا یې ټینګار وکړ.
همدارنګه د څېړنو او علمي مجلې مرستیال پوهنوال ډاکټر نورعلي مهمند د استادانو او محصلینو له خوا د علمي څېړنو د پراختیا په اهمیت خبرې وکړې او د پوهنتون په علمي پرمختګ کې یې د هغې رول مهم وباله.
وروسته د محصلانو چارو مرستیال مولوي عبدالهادي یاسر د فرهنګي کمیټو، د محصلینو د خدماتو، د کارشناسۍ کمیټې او نورو اړوندو موضوعاتو په اړه لارښوونې او لوایح بیان کړل.
په دوام کې د مالي او اداري چارو مرستیال حافظ محمد بشیر مجاهد د ۱۴۰۴ کال د پلان د تطبیق کلنی راپور وړاندې کړ او د هرات پوهنتون د شمالي دروازې د بیا پرانستلو او د پوهنتون په املاکو کې د خصوصي شرکتونو د پانګونې د جلب په اړه یې معلومات ورکړل.
همدارنګه د کیفیت د تضمین آمر پوهنمل احمد فیصل اکبري د ۱۴۰۴ کال راپور او د هرات پوهنتون د علمي پروګرامونو د دورې عملي پلان تشریح کړ.
په پای کې د غونډې غړو د استادانو د ترفیع، تثبیت او انفکاک دوسیې وڅېړلې او اړینې پرېکړې یې وکړې.
غونډه د خیر دعا په ویلو سره پای ته ورسېده.
آمریت ارتباطات وآگاهی عامه پوهنتون هرات
