د هرات پوهنتون د استادانو مسلکي ودې آمریت د اداري مهارتونو د لوړولو او د علمي کادر د پیاوړتیا په موخه د پوهنتون د پرمختللې رهبرۍ څلور ورځنی ښوونیز ورکشاپ پیل کړ.
په دې پروګرام کې استادان د پرمختللو مدیریت مفاهیمو، نوو رهبرۍ میتودونو، او په علمي چاپېریالونو کې د فعالیتونو د لوړولو ستراتیژیو سره بلدتیا ترلاسه کوي.
یاد ورکشاپ د شیخ القرآن والحدیث مولانا عبدالغني حقاني حفظه الله، د هرات پوهنتون رئیس، قاري محمد بشیر مجاهد د پوهنتون مالي او اداري مرستیال، پوهندوی رحیم بخش فقیر یار د استادانو د چارو آمر، پوهنوال ډاکټر شعیب احمد شاخص د استادانو مسلکي ودې آمر، او د دې ورکشاپ ګډونوالو په شتون کې پرانیستل شو.
پروګرام د قرآني آیتونو په تلاوت سره پیل شو. وروسته شیخ القرآن والحدیث مولانا عبدالغني حقاني (حفظه الله) د هرات پوهنتون رئیس، د استادانو د مسلکي ودې آمریت څخه د دې ورکشاپ د جوړولو لپاره د مننې او قدردانۍ تر څنګ د داسې ښوونیزو پروګرامونو پر اهمیت خبرې وکړې. هغه وویل چې د پرمختللې رهبرۍ په برخه کې د ښوونیزو ورکشاپونو جوړېدل د استادانو د مدیریتي او علمي-عملي وړتیاوو په لوړولو کې مهم رول لري او کولی شي د پوهنتون او د هیواد د علمي ټولنې د پرمختګ لپاره زمینه برابره کړي.
د هرات پوهنتون رئیس ټینګار وکړ چې د علمي کادر ترمنځ د رهبرۍ مهارتونو پرمختګ، نه یوازې د ښوونې او روزنې په کیفیت کې ښه والی راولي، بلکې د پوهنتون د منابعو مدیریت او فعالیتونو پیاوړتیا کې هم مهم رول لوبوي.
له دې وروسته یاد ورکشاپ د پلان سره سم په رسمي ډول پیل شو.
