آنلاین سیمینار: اضطراب؛ خاموش دښمن او که مثبت محرک؟
د هرات پوهنتون د محصلانو چارو مرستیالۍ د مشورې مرکز د هېواد د پوهنتونونو د مشورتي مرکزونو مسوولینو لپاره د «اضطراب؛ خاموش دښمن او که مثبت محرک؟» تر سرلیک لاندې آنلاین سیمینار جوړ کړ.
دا سیمینار د محصلانو د خدماتو د انسجام آمریت د مشورې مرکز مسوول محمد شعیب شهیر په ابتکار جوړ شو، چې پکې د بېلابېلو پوهنتونونو مشاورین او مسوولین ګډون درلود.
په دې سیمینار کې اضطراب له بېلابېلو اړخونو وڅېړل شو او له وېرې سره یې توپیر تشریح شو. همداراز، د اضطراب فزیکي او رواني نښې وشنل شوې او دا موضوع وڅېړل شوه چې اضطراب څنګه کېدای شي په ځینو حالاتو کې یو مثبت محرک وګرځي او خلک بریا ته سوق کړي.
همداراز، د سیمینار یوه بله مهمه برخه د اضطراب د مدیریت او کمولو لپاره علمي او عملي لارې چارې وړاندې کول وې. په دې لړ کې، د میډیټیشن تخنیکونه، د ساه اخیستلو تمرینونه، د منفي افکارو مدیریت، او د ژوند طرز بدلون د مؤثرو میتودونو په توګه معرفي شول.
