*دلوړو زده کړو وزارت د کارکوونکو چارو رئیس د هرات پوهنتون له مسوولینو سره وکتل.*
مولوي سلطان محمد محسن، د لوړو زده کړو وزارت د کارکوونکو چارو رئیس او ورسره پلاوي، د هرات پوهنتون له علمي مرستیال او سرپرست مولوي محمد موسی فایق، د مالي او اداري مرستیال حافظ محمد بشیر مجاهد، د ریاست دفتر آمر الحاج مولوي نورالحق ازهر، او د دې علمي بنسټ د اداري (مالي او اداري معاونیت) د برخو له آمرینو سره وکتل او خبرې یې وکړې.
مولوي سلطان محمد محسن د هرات پوهنتون ته د سفر له امله خپله خوښي څرګنده کړه او د دې لیدنو موخه یې د کارکوونکو د چارو د سیستم لوړتیا د هغوی د دندو د لایحې سره سم، د اداري برخو ترمنځ د همغږۍ ښه والي، د منظم مجلسونو جوړول، د وړ او شایسته اشخاصو استخدام، د کارکوونکو د حاضري ته جدي پاملرنه، او د هغوی د ظرفیت لوړونه وبلله. نوموړي زیاته کړه چې ورسره پلاوی پلان لري چې د کارکوونکو د وړتیاوو د ښه والي لپاره د ظرفیت لوړونې سیمینارونه جوړ کړي.
مولوي محمد موسی فایق، د پوهنتون علمي مرستیال او سرپرست، مېلمنو ته ښه راغلاست ووايه او وویل چې د هرات پوهنتون کارکوونکي به د معزز پلاوي له تجربو او مهارتونو ګټه واخلي. هغه ټینګار وکړ چې دا همکاری نه یوازې د پوهنتون علمي او تعلیمي کچه لوړوي، بلکې د دواړو خواوو ترمنځ د پوهې، مهارتونو او تجربو د تبادلې فرصتونه هم برابرېږي.
حافظ محمد بشیر مجاهد، د مالي او اداري چارو مرستیال، د لوړو زده کړو وزارت د کارکوونکو چارو ریاست د ظرفیت لوړونې پروګرامونو ته ښه راغلاست ووايه. نوموړي د پوهنتون د اداري برخو د تشکیل او فعالیتونو یو عمومي راپور وړاندې کړ او د لوړو زده کړو وزارت د همکارۍ او لارښوونې اړتیا یې د اداري چارو د ښه والي لپاره یاده کړه.
د غونډې په پای کې، حاضرینو خپل نظریات او وړاندیزونه د بېلابېلو برخو په اړه شریک کړل.
